陶傑：中圖哺奶醜聞

2013年01月21日

中央圖書館有一名婦人當眾解鈕剝衫哺母乳，遭到實Q喝止，嚴正指出：中央圖書館公眾地方，不准飲食。

婦人不服，向平機會投訴。但保安做得啱，因為堂堂圖書館，有公眾在四周，該婦人竟解衣餵奶，當眾露點，已經構成淫褻色情行為，你向平機會投訴？我向明光社投訴就真。

因為該婦人雖然以為母愛偉大，而懷中幼B，啜飲甚歡，你覺得溫馨，但四周有維園阿伯，久經性飢渴，又無錢出火，平時在對面周日維園論壇，受得劉慧卿余若薇陳淑莊等婆乸氣多，忽見乳頭奶汁，眼花花情緒失控，橫加暴爪襲擊，到時叫警察來控非禮，阿伯一面高呼挺梁、打倒色情女漢奸，那時警察不知落唔落案好？

一個地方有「中央」二字，即屬道德聖地，何況四周還有血氣方剛之青少年。不管你母愛偉大與否，或日本奶粉有無添加劑、幾受大陸水貨客歡迎，香港文化，露點即屬不雅淫褻，否則，TVB劇集，加一場戲：高海寧嫁入陳豪家門，生個BB，夫妻爭論如何養仔，陳豪認為，奶粉夠營養，但妻子不肯，偏偏個劇集今次冇奶粉商贊助，編劇又有小男人私心，情節需要，高海寧即解衣餵奶，大特寫鏡頭，收視即勁爆六十點，你話得唔得呢，又？