陶傑：香港人民食堂

2012年12月11日

睇完馮小剛的《一九四二》，就會明白中國人最大的恐懼就是飢餓。

所謂良心企業，講最大的良心，就是切合中國千年國情。譬如嘉道理家族的中電，鑑於物價飛漲，又有許多家庭收入微薄，但有骨氣，不領綜援，在兒女面前，實踐「貧賤不能移」之儒家家教。

咁點呢？有見及此，中電即動了慈悲心，以西方耶穌教五餅二魚精神，推出一個「有營飯堂」，結合中國大躍進時代人民食堂的經驗，十蚊即有一餐，而且食物營養足夠，有一飯、一菜、一湯，參加者只須證明到低於住戶平均收入中位數之一半，即可扶老攜幼，前來排隊交錢，十蚊就食飽。

做電力生意，是好辛苦的。發電要燒煤，煤炭被大陸搶貴價，又受環保團體監督聲討，機器又要更新。遇到梁班子不爭氣，民憤增長，電費又唔加得，一加就被梁班將民憤轉嫁入數過來。本來要去政總抗議的，經別有用心者一挑撥，變成走向電力企業門口拉橫額。

做公共企業，轉數要快。加少少電費幫補成本，就要拿番少少出來。十元營養餐，係一條出路。大陸可以參考；北京上海，只須開個人民食堂，招待民工，咪會少好多暴亂啦。