陶傑：皇室大婚中國化

2011年05月09日

英國威廉王子大婚，兼夾拉登瓜老襯，紅白雙喜普天同慶，二十億人現場收睇，評頭品足，香港觀眾更激起懷念前殖民地宗主情懷。睇威廉仔娶老婆，香港D師奶老伯，仲開心到好似自己個九十後仔娶個湖南妹。
各大華文媒體，尤其口口聲聲「知識分子」嗰D，平時得把口猛話要打破「西方文化話語霸權」。點知，人哋皇室大婚，普世「軟實力」，仲證明堅揪過香港億萬富豪嫁女聯婚，香港傳媒落足吃奶氣力，做十幾廿版，Hi過神舟五號歸天。之不過，我就唔明，英國國勢衰落，英國佬知衰，不喧嘩，不吐痰，威廉娶吉蒂，品味雖高尚，人哋個新晉王妃，全身婚紗樸素，條頸冇一串周大福，手腕亦唔見有謝瑞麟，心口冇太子珠寶，以我國小農暴發物質角度，曾蔭權娶新抱，都會豪過佢，有乜好圍觀？
除非過二十年，我國國力強大，十四億人口走向全世界，中國文化四海揚威。到咗威廉同吉蒂個仔娶老婆，我希望到時會全面引進中國小農金銀文化，例如到時英國王室大婚，就要由廣東省重金請隊D打佬，喺北京打造一頂黃金大紅花轎，到時英國王子，全身戴卜帽，著長衫，腳踏功夫鞋，扮到以前粵語長片新馬仔「傻仔洞房」咁嘅款，再加埋全套中國文化，王子方面有兄弟團，而王妃嗰個陣營又有姊妹團，向前來拍門迎娶嘅王子，嘈喧巴閉，嘻嘻哈哈，收取九千九百九十九歐羅開門利是。
到時，雖然喺西敏寺舉行婚禮，不過個教堂裡面要擺觀音菩薩像，王子公主一齊拜天地，跟住鬼妹仔嘅王妃，手抱啤啤熊，手作V字影完相之後，就要向個老母三跪九叩斟新抱茶，大門外就請陸智夫同夏國璋體育會、重金由前殖民地香港飛來助興，一條大紅金龍飛天，一隻翠綠彩鳳，茶篤撐，燒串東莞紅雙喜大鞭炮，噼噼啪啪，咁樣先至叫做中國真正崛起。
咁嘅場面，今年就冇咁嘅眼福咯，過二三十載，以我國GDP增長得咁勁，完全有可能。今日，本人白紙黑字作此預言，AM730讀者可以剪存時光錦囊，等二十年後就知道我冇講錯！