日本性遊學團

2011年06月01日

特府關愛基金向有錢佬揼心口，當初話揼足五十億，點知香港特區富豪精過甩邊，睬你都儍，求其應酬六億幾算數。
皆因為關愛基金愈睇愈唔對路，因為特府竟然話，準備喺關愛基金撥款，向每位清貧子弟贈送三千元資助佢哋遊學。三千遊學費用，遊得去邊？本欄早已預測，最遠遊學小明去廣州，近即可以由天水圍遊學去油尖旺。而天水圍學童遊學九龍半島，此一建議，亦得到香港某D大氣電波時評人抄襲，在電台節目公開宣揚，並拒絕付出版權費。
遊學團去邊度好呢？原來最近日本新潟縣推出一個處男處女學習樂園，邀請未婚處男女人營，接受性學教育，兼有導師指導實習性經驗。E個性遊學樂園，費用大約港幣一萬四千幾，望落個課程，不但有晒中學性教育所有知識，最難得嘅係，仲有專業教師指導埋D同學仔，男女同Group一齊做實驗添。
咁關愛基金三千元遊學津貼，就可以同富豪捐出入六億幾善款配對。唔好津貼得三千蚊咁寒酸，就俾夠萬四。現時關愛基金善款共有六十五億八，天水圍屯門兩地清貧子弟，直頭送去日本新潟參加處男處女性教育遊學園，一來可以教育創新，令清貧子弟無需上廣州或去油麻地遊學，對比有錢佬仔女去親就倫敦紐約等西方先進國家產生自卑感，清貧子弟有得去日本，心理平衡番，亦吐氣揚眉。
同時亦係一個寶貴機會，向日本政府及全體國民，顯示香港人對地震海嘯及輻射災難中之日本大和民族，表示關愛兼表達敬意。香港天水圍遊學團，去到新潟遊學，變咗一關兩愛，不只香港低下階層，仲愛埋日本災民添，正所謂花開兩朵，各表一枝，你話幾咁美滿。
喺清貧子弟得到津貼，由日本返來之後，由於得到第一手性學經驗，並由日本名師指導，返到香港，佢哋就可以專心學習，將滿腦子上電腦睇色情網絡或援交睇AV之淫褻思想放埋一邊，因為曾經滄海，除卻巫山，E啲嘢未見識過就好神秘，參加完處男處女遊學團實習返來，冇晒神秘感，就可以集中精神，快樂學習中英數理化。
嗰陣時，話唔定天水圍屯門新移民之清貧子弟，學習能力突飛猛進，讀書仲叻過有錢佬D仔仔女女添。