七一警力大傾斜

(2011年07月11日)
七一大遊行，究竟有幾多人？警方一口咬定得嗰五萬一千，首領范國威話十萬，後來改口二十二萬幾。
有人話：雙方都冇錯。禿方口中嗰五萬，確實係五萬，另外嗰十六萬，即是警方之軍裝及便衣差人跟住行。
尤其係便衣，禿方學習祖國控制天安門，今年七一，便衣五步七八個，十步十零個，揸住相機攝錄機係咁影。
特府把口話：「尊重市民示威權利」，不過就用秘密警察來偷影攝錄。若然咁係成立，咁好多商場同女廁，下面匿埋之色魔，用手機埃瘋或者攝錄機偷影女人裙底，再放上網，都係尊重緊婦女行路、如廁、沖凉之權利啫。
全港所謂色魔，至緊要向便衣學習，有樣學樣，將尊重女人之權利，用攝錄機同手機來慢慢偷影，影得愈清晰，愈纖毫畢現，即是越尊重咁解。
至於十幾萬秘密或公開警察，去監控嗰五萬一千小撮示威者，亦引伸一個危機。以後阿蓋達組織，可以密切留意：年年七一，特區警方原來重兵布防。堆晒喺維園、灣仔電車路、金鐘及中環。即是九龍、新界真空。喺天水圍爆個炸彈，或者炸平個華富邨，就冇警力過來追剿恐怖分子。
或者打劫銀行，D湖南幫亦都會發現，最正係揀正七月一日落手，將D出納紮起晒，跟住抬銀紙，警方唔通由示威路線抽調兵力返來救銀行？緊係唔會喇。所以明年七一，D港人示威者不妨叫定D細佬妹，明修軒尼詩道電車路，暗渡獅子銀行金庫倉。聲東擊西，E頭嗌林公公落台，嗰頭搶銀行、劫米舖，擔擔抬抬，全港基層市民，七一一齊大發財LU。