新垃圾大樓風水邪

2011年10月20日

添馬艦之新垃圾會大樓，啱啱落成尚未開光，就發生工業意外，一名中國工人觸電慘死，成為新垃圾會大樓之第一號冤魂。
此一象徵「中國人民吐氣揚眉」之新垃圾會，風水麻麻地，搬咗入去，不但死人，煲曾及鈺曾兩名領導人，仲要即時失心瘋，一個「隻抽瘋犬症」，將積壓多年之憤慨，一鋪爆發，直斥瘋犬係流氓，將垃圾會當做黑社會，而鈺曾則將長毛之高聲提問，一時耳聾，聽錯做講粗口咒罵，落錯柯打，一盅兩件，將長毛與瘋犬症一併串燒，趕出議事廳。

咁都未夠邪，連新搬入之食Q部隊亦兵分兩路，大失常性，與記者發生衝撞扭打。咁就證明，添馬艦新垃圾會大樓，風水磁場，出現嚴重之問題，搞出人命、犯赤口，當初冇請到一隊和尚預先走來打齋LING LING，係特區政府之嚴重疏忽。點解咁邪？因為「添馬艦」此一位置，在殖民地時代，乃係大英帝國軍事重鎮，用來停泊戰艦，所以叫做添馬艦。帝國主義侵略我國，殺人放火，港英之罪惡統治，又罄竹難書，包括鎮壓一九六七年愛國抗暴，一九八九年六四期間想挑動香港為顛覆基地，以及留低大量港英餘孽AO無間道等等。

添馬艦此一地點，實在係罪惡中之罪惡，邪中之邪，搵和尚唸金剛經，都未必夠力，特區政府在奠基打樁之日，應該由重慶請來一支唱紅打黑文工團，揸毛語錄，唱番九九八十一隻紅歌，並在個打樁穴先將一具毛主席石膏像扑爛放入去先至入樁，咁先至可以驅鬼辟邪。做少此步功夫，唔怪得又電死工人，雙曾與瘋毛兩大陣營共四大精英，集體撞邪，癲完可以再癲。中國玄學文化博大精深，唔係煲曾信嗰隻白人天主教咁簡單，做少D程序，當堂開光大吉利是LU。