如何阻截產婦侵港

2011年12月21日

大陸產婦來港強行生仔，兼霸佔產房，圍食火鍋之問題，搞到天怒人怨，連CY哥都忍唔住，嚴正聲明：祖國大肚婆經已威脅到香港醫療生存權，教育福利、母嬰健康問題，冇辦法再等阿爺釋法，一定要進行嚴打。

所謂井水不犯河水，河水不犯井水，但而家大陸大肚婆就用羊水來犯井水，咁即是想點？

要落來生仔，不但將D醫院產房牀位炒到貴晒，大陸產婦霸牀生產，仲要搶貴D奶粉、尿片、嬰兒車、百佳惠康、入唔切貨，唯有坐地起佢價，咁香港D小貧友同BB，咪一出世就做咗窮鬼？

點樣阻嚇鄰近地區之羊水犯井水呢？局長周一鑊話，佢有時走上羅湖邊境，親自勸退。但連CY哥都唔理阿爺勸退，一意孤行去馬，你周一鑊何德何能，可以勸得退大肚軍呢？

唯一辦法，就係效法祖國城管。講文明，叫你D農民交土地搬屋，好聲好氣講你唔聽，就唯有用城管進行強拆。特區政府要設立一個「愛港護B跨部門小組」，由曾煲出任組長，CY出任執行主任，小組成員有林公公、周一鑊、唐唐，人唔好多，最緊要有效率，調動全港九十後，成立「志願胎管隊」，揸齊擔挑、銅鑼、大聲公、木棍，齊集羅湖邊境。

一見到大肚婆娘子軍闖關，特區胎管隊即時對住個大肚婆敲銅鑼、吹喇叭，用擴音器，播放在香港市區錄得之各種噪音，例如打樁聲、狗吠、巴士阿叔「你有壓力，我有壓力」之原聲帶，實行負面胎教攻勢，將大肚婆肚內之胎兒，嚇到心神不寧，亂咁拳打腳踢，覺得香港E個野蠻地方亂過亂葬崗，拒絕越境出世，嚇到產婦步步退縮回另外嗰邊界為止。甚至當場小產一兩名，咁咪可以有效阻嚇到囉。

E一招以前毛主席發動全民滅蔴雀，都用過，喺地下敲打面盆，搞到D蔴雀落唔到地，橋唔怕舊，至緊要有效呀。」