陶傑：反屍爬，移監倉

2013年01月23日

梁特施政報告，全港鬧爆，因為房屋冇料到。狼英無法增建公居屋，因為找不到地。

本人服務社會，本着「不該為鬧而鬧，批評要有建設性」之知識份子良心，建議收回赤柱石壁等監獄，拆卸起公居屋。囚犯北移大陸，改在東莞深圳踎。

有人大罵：你這樣豈不是罔顧人權？大陸黑獄，在裏面打到飛起，你陶某不用坐監，講風涼話，有無想過在囚人士感受？咁黑心，你想製造中國式午夜快車呀？祝你早點入冊呀！

我答：「大佬，不要對大陸咁有偏見好不好？在大陸入冊，國情有別，隨時待遇好過踎赤柱。因為中國的法治，講彈性，好講人情味，只要識得管理員，肯磅水，不但不會受虐待，而且還可安排揼骨、搓腳、洞房花燭，只要在囚人士家屬了解我國潛規則，只怕香港監犯在大陸服刑，服得不肯出監，還要申請國家特殊照顧再加刑呀。」赤柱、石壁、芝麻灣，全部是風水吉地。北遷之後，若真的不放心，仍可由香港懲教署管理，如深圳灣一地兩檢。但咁就樣樣法治揸正做了，哪樣更好？你諗你了。

對方聽了，低頭無語。

監獄北移，絕對行得通，如果國家照顧，來個「反CEPA」，先行轉移在囚人士，平衡每天一百五十個新移民，香港又沒有法輪功坐監，放心啦，冇事的。