陶總將功贖罪

(2011年07月20日)
香港外傭發動請願，要求將居港期滿七年之菲傭、印傭、泰傭等，轉正永久居民地位，從此可以合法，永久居留香港。
咁又係。菲傭、印傭、泰傭，十八九歲大學畢業，過來香港做牛做馬，熬足七年，喺南洋鄉下之未婚夫，包咗第二個，又或者居港期間遭到僱主虐待，煲湯唔夠熱，俾阿太摑兩巴，久唔久又俾男戶主猴擒非禮，敢怒不敢言，驚炒魷魚。
七年青春，在做牛做馬兼有淚心裡流之狀態下，時光飛逝，輕輕溜走，期滿之後，若然又將人打戒番戰火紛飛兼局勢動盪又隨時發生政變之東南亞，老公又冇埋，家庭又散晒，試問又情何以堪？
陶總點解要企喺菲傭外傭等角度講說話？冇錯嘞。各位估中晒，因為陶總有案在身：前兩年，陶總本著愛國心，在英文雜誌發表專欄，指香港人有義務教育菲傭，重申南沙群島係中國領土，點知遭到香港一小撮反華反共知識分子、學者、智囊謾罵，指陶總「種族歧視」。該等手指扭出唔扭入之賓奴寫手及漢奸政客挑撥、鼓動之下，卒之搞到六千菲傭中環大遊行，高呼打倒陶總、並逼令陶總出面「道歉」。
當年陶總左望右望，希望特府有個發言人，本住愛國愛港、捍衛言論自由之立場，同陶總講兩句公道說話，豈之特府上自特首，下至新聞官，個個龜縮，咁陶總形勢孤立，唯有死死氣向賓方發表一輪語言含蓄、主題模糊之官方道歉聲明。
陶總當日顧全大局，由於今時仲不獲賓方批准入境，故此兩年來洗心革面，做個好人。捍衛南沙主權，原來就是「種族歧視」，咁陶總明晒，即是支持菲律賓政府擁有南沙、改稱南海為菲律賓海先至叫做人權平等。同時陶總吸收教訓，今次一定將功贖罪捍衛菲傭獲得居港權，以向菲律賓政府示好擦鞋，希望賓總早日發還進入菲律賓境內揼骨旅行之馬尼拉回鄉證，回復本人行動自由。
所以，冇法啦，陶總今次要洗底，為弱勢族群大聲疾呼。熬完七年又七年，連無間道嗰個陳永仁都頂唔順，菲傭又係人，佢哋工作滿腔血淚，點解唔得呢？所以陶總在此呼籲《am730》讀者：各自返家同媽咪進行耐心說服教育工作，請老媽子支持屋企嗰個菲傭，只要熬滿七年，即可以攞香港身份證兼特區護照。在特府示好之下，賓總或者會大起惻隱之心，將南洋群島嗰十幾個，還返一個俾中國，外交讓步，咁大家咪中賓港三贏局面，一片和諧囉。