陶傑：唐唐演辭句句么心么肺

2011年12月20日

紀曉風 獨眼新聞

陶傑：唐唐演辭句句么心么肺

一拖再拖的唐英年參選大會，昨天終見家翁；老紀聽畢全文後也覺較唐英年平日表演為佳，但至於有幾好，老紀找來學貫中西的才子陶傑點評。才子坦言唐唐演辭平實，還提及香港核心價值，即自由、公平等等，而這些核心價值，似乎振英未曾觸及。

■第一佳句：「We are tomorrow」

■陶傑點評：如果讓我翻譯，我會譯為「明天在我」；因為英文中「We」可以是眾數，例如「We are Chinese」係指全中國嘅人，不知是不是唐營知道現時香港人中文水平差，「畫公仔要畫出腸」，如果只譯「明天在我」，就有人會話「你做咩咁霸道？明天只屬於你㗎?!」

■第二佳句：「親疏無間……」

■陶傑點評：呢句大有學問、更有玄機，一則窒煲呔嘅「親疏有別」，二則「無間」是向自己老友林建岳套大賣電影《無間道》致敬！是為一石二鳥！

■第三佳句：「令到不同界別人士，都可以互相欣賞，繁榮共建，我係深信香港嘅工商界、中產、專業人士、勞工同廣大市民係並無尖銳到唔可以解決嘅矛盾。」

■陶傑點評：呢句係同阿爺講，亦係同市民講；有好多人話唐唐上台後香港會暴動，呢句就係同佢哋講，「咁即係使唔使暴動呀？！」所以我哋講嘢，有時候要簡潔，有時候不妨兜個圈；暴動始終唔係大家所想，所以應不同階層，坐低慢慢傾。

■其他佳句：「由一條小漁村，到畀外國管治多年；由辛亥革命到回歸祖國，香港人愛國情懷，始終無變。」

■陶傑點評：這些就是Grand Opening，猶如占士邦電影最重要就是睇開頭五分鐘；畢竟昨天不是政綱大會，只是提參選；所以要做到好似棉花糖咁，又大又吸引，有啲粉紅色咁靚靚哋，但可能一咬下去只是棉花、空氣。

■「今天，香港是中國土地上最自由、最開放，法治最成熟嘅城市；香港，就係咁不平凡。」

■陶傑點評：呢句看上去是踩中國其他城市，但踩得好，我嫌佢踩得唔夠勁！如果香港唔優越過其他大陸城市，點解內地孕婦要來香港生仔？點解內地資金要來香港買樓？鄧小平一提「一國兩制」，即係承認咗香港優越啦！對香港係最重要，唔係咩有無屋住、有無劏房，自由同人權係最重要！

■「我希望領導一個人性化嘅政府，我哋喺會告別冷漠、我哋會締造共融。」

■陶傑點評：回歸14年，不論董、曾，香港都係冷漠，而家我哋嘅城市最欠缺的，莫說是共融，而是欣賞；以往就算係有錢佬，見到啲搭棚工人，嘩！幾支竹都搭到棚，穩穩陣陣，佢會欣賞；就算係大笪地表演心口碎大石，行走江湖，市民都會欣賞；好似的士司機咁，一日踩幾更，做足十幾個鐘都唔黐線，我哋都應該欣賞。

■「支援教師，減輕行政工作，專心教學；支持家長，減輕不必要教科書和補習開支。」

■陶傑點評：句句「么心么肺」，針對對家競選辦嘅羅范椒芬；其實都係講緊教改失敗，老師咁多行政工作，因咩事？學生係咁補習，又係補咩？咪又係英文！全部都是教改和母語教學惡果。

陶傑總評：總體來說，演辭平實，說出來政綱亦令人期待；但問題是如何執行，例如講到教育，以往阿董時代，啊！優質教育基金就係買幾部電腦，咁咪係唔夠人性化；你唔派6000元，但就改善教育質素，例如畀多啲平價國際學校開辦、或者喺啲貧民區開啲平價國際學校，請多啲外籍教師教英語，那才是人性教育而非硬件。