截資即隱性港獨

2011年06月15日

祖國資金湧嚟香港炒豪宅，搞寸個市，有人呼籲，要限制大陸客落嚟買樓，以免香港人冇屋可居。
咁嘅叫囂，無視於炎黃子孫血濃於水大家庭與民族主義大原則。今日唔俾大陸資金落嚟買樓，明日又唔俾祖國大肚婆落嚟生仔，後日又話唔俾北姑嚟大富豪坐枱，唔俾E樣，唔俾嗰樣，即係搞隱性港獨，發展落去，就會連港澳辦主任王光亞落嚟又唔俾，李黑強落嚟慶回歸又唔俾，實在十分危險。
搞攔截熱資嘅市場隱性港獨，阻止大肚婆嚟生仔嘅子宮陰道隱性港獨，搞吓搞吓，就必然會發展成實質之政治港獨。E頭話港珠澳大橋與港一體化，嗰頭就唔俾國家資金落嚟買樓、祖國大肚婆落嚟生仔，即是明修棧道，暗中割斷香港同祖國血脈相連之臍帶，香港有冇商界陳水扁、婦產科呂秀蓮，背後有咩陰謀，十定要查到底。
遙想沙士當年，香港經濟崩潰，國家即時開放自由行，開閘排洪，將十四億同胞以長江水河浪排洪來香港，即時扶貧見功。好嘞，現時香港人好了瘡疤忘了痛，輸打贏要，反而唔認祖國偉大母親，竟然視大陸資金為洪水猛獸，予以堵截，並破口大罵，係咪忤逆子，恩將仇報？
美資你就要，英資你又話高尚，獨係祖國熱錢，就嫌腥臭，有一日，祖國熱資買起咗成間太古百分之五十一，再用太古(中國)名義，買晒種植道，成條路獨立屋。咁係英資定係中資呢？
搞熱資港獨，子宮陰道港獨，進一步就係全面割裂，整吓整吓，就變咗全方位港獨，此風不可長，民族敗類，決冇好下場。