Monday, June 20, 2011

塑化JJ大災難

2011年06月20日

台灣爆發塑化劑大污染,搞到總統馬英九都要出面調查。最近發現塑化劑之遺害十分大劑,不但影響腸胃,威脅健康,仲令到下一代台灣男嬰,出生時陰莖只得二點九公分咁短,發育到五歲,最多都係五公分,即係一粒半花生咁多。經專家用間尺度,發現除種族差異外,台灣男嬰生殖器較西方白種人短零點五至零點七公分。研究團隊懷疑,不排除係塑化劑污染所造成。
醫學界表示,塑化劑與性發育有關,男嬰受塑化劑所害,出世條JJ就短咗,咁女嬰亦冇理由個胸越發育越大,統計落去,應該係台灣女嬰未來二十年發育時會更加飛機場。
港男港女一海之隔,唔好幸災樂禍。因為最近報道,香港人百分之九十九,體內亦含有塑化劑。請am730各位男讀者,睇到此處,即刻入廁所,除褲照吓塊鏡,自慚形穢,就明白原來係塑化劑所害嘞。現時西方文化霸權,白種人國家久唔久就公布全球男性JJ尺碼比賽中,都係名列倒數一百八十六同埋一百八十七,連埃塞俄比亞J同埋孟加拉J,都堅挺秀拔,一J擎天,遠遠拋離我哋中華民族。
民族尊嚴,祖國崛起,七成就係靠將條JJ擺上枱,睇吓你長定我勁。點知現在台灣馬狗仔管治無能,行政陽痿,搞到台灣下代雄風盡失,JJ龜縮,變成「塑化男」,唔係大劑,而係超細劑,仲要將E味縮J藥出口嚟香港,進軍大陸,現時美國戰艦船堅炮利,幾千口導彈,碌碌堅挺,係咁對正我祖國大門之時,你搞到全國下一代JJ縮到粒花生咁,正一係「天府尺碼」,分明就是長白種人志氣,滅我大東亞子孫威風,憑此一樣,我國就要出動解放軍,早日拿下台灣,生擒馬狗仔,恢復我大漢J威。
塑化劑單嘢搞到咁大劑,亦令到廣東話歇後語文化承傳困難。例如以後港男之間嗌交,若果話:你中六合彩我就切!日後塑化劑流行,切乜嘢?所以連廣東話文化精粹都消失埋,台灣佬,今次炎黃子孫真係俾你害Q死嘞。

Labels: ,

0 Comments:

Post a Comment

<< Home