亞洲國際城市

2011年07月22日

香港二十四萬菲傭印傭泰傭，要求居港熬驢仔期滿七年，同大陸移民一樣平起平坐，享得永久香港居民身份待遇。
此一要求，即時遭到香港民情反彈，覺得等於中門大開，從此賓傭印泰婦女，做滿兩三張合約，就可以永久合法嚟港，跟住免費享用醫療福利。
港人咁樣擔心，又唔係冇理由。可惜，香港經已簽署聯合國人權憲章，接受西方文明國家制定之遊戲規則約束：人人生來不問膚色、種族及教育，俱享有平等之權利。大陸二奶來香港住滿七年，個個轉正三粒星，點解賓傭做牛做馬足七年，就要執包袱兼兜巴星？一旦所有外傭取得居港權，亦應參照大陸大肚婆之先例：全部外傭，有權大肚，大肚之後亦有權享用瑪麗醫院等公共醫療劏肚生仔設施。到時香港公共醫院床位緊張，無需恐懼大陸婆衝關賴死，坐喺地下強行生仔，到時就有印支半島各國，大肚外傭，取得居留權之後，在各大政府醫院產房，與大陸大肚婆爭床位，搶空間，決一死戰。
咁樣，反而香港人之利益受到保障，因為到時賓傭印泰大肚婆組成南洋生產大軍，與大陸大肚婆開拖大戰，嗰陣時，雙方殺到沙塵滾滾，不可開交，香港大肚婆反而可以偷襲產房床位，生產成功。
菲律賓係天主教國家，天主教唔准戴套，所以可以任生唔嬲。生七個又得，生一打亦唔嫌多，申請埋喺呂宋島個鄉下老公過來，一家團聚，一齊榮獲永久居港權，若然遭到歧視，冇人肯請，全家攞埋綜援，亦樂也融融。
所以凡事唔可以睇負面。香港係國際城市，印尼泰及賓賓外傭，仔女在香港成為永久居民，香港之中小學就可以增設賓話、印尼文、泰語等課程，自由修讀，與英文及普通話百花齊放，咁先至叫做一個似模似樣之國際城市吖嘛。
又係香港自己有名叫Asia’s World City，冇番咁上下賓印泰永久居民，香港點可以保住。多D種族，多D文化融和共處，香港明天會好。