香港特區喜臨門

2011年7月27日

鄰近地區高鐵相撞冚包散，又瓜一百幾十，特區華文傳媒大譁，定性為「國耻日」。鄰近地區有幾多國耻日，陶總冇乜研究，不過同一日，陶總認為，應該定為「港慶日」，因為美國國務卿希拉痢婦人，應特區元首煲曾之邀，對香港進行國事訪問，並對煲曾進行親切友好平起平坐之交談。香港E個自稱之「亞洲國際都市」，經曾煲大膽實踐「次主權」之後，成功爭取美國希婦人來香港，在面珠仔錫一啖祝福。
煲曾夠人脈、夠飛屎、夠牙力，仲帶挈埋垃圾會四大政黨頭目——在美國政府眼中排名絕對分先後——公盲黨余若薇、民煮黨矮仔仁、豉油黨張乳人、民賤聯李慧琼，齊齊昇呢，掹艇邊可以一親美國白種貴婦國務卿希拉痢之芳容，名正言順，得到白種外國勢力垂青，見埋一份，真係開心到三日三夜，瞓唔著覺，千秋萬世，光蔭子孫，香港開埠以來，未試過咁威威，好話嘞，喺E一日話之鄰近地區高鐵撞到七彩，仲唔係港慶日？
所以話E四大政黨、唔好咁冇良心。若然唔係曾蔭權爵士人格高尚、地位崇高，先得英國皇室封爵，打咗個西方文明社會品質檢證認可放行之皇家印，區區一個普通中國城市之市長。希拉痢點會俾面，舉行希曾高峰會，深入商討香港政制發展民主普選、90後危機、地產霸權等問題？並且細聲講、大聲笑，凸顯姐弟情、自己友，並由煲曾親自批准，點名垃圾會四大頭目可以掹艇邊拉裙腳，參與親美西方文明之雨露光澤？
去年今日，煲曾為營救香港人質，想打電話俾哈佛校友之賓總阿雞樂三世，遭到特區漢奸之人，反中亂港之親中愛國仇曾分子誣陷，話佢搞次主權兼隱性港獨，今次煲曾顯示實力，掌摑對方。不過美中不足，係冇叫埋80後、90後派代表，見埋希拉痢一份，向希婦人匯報下次圍垃圾會之茉莉花大計。不過，唔緊要，今次行程緊湊等下年喇！