陶傑醒你 - 英年一出真係有人早逝

2011年12月28日

我國最親密之盟友，北韓話事人不幸火車心臟病發，即時歸天，消息傳來，全港哀悼。唐唐參選，腳頭果然強勁，一出場就剋死鄰國領導人，由於輻射太強，連遠處之孫公都頂唔順唐唐強勁磁場，不幸搞到要肺炎躀低入院。
對比上趟，唐唐想出場參選。花園街唐樓即時大火，九人蒙難，火場中有隻唐狗汪汪汪係咁吠，於是救出四條人命，當日陶總就結合玄學文化通識，莊嚴預測：此是天意，唐唐此一香港特首，火燒旺地、唐狗救人，注定凸首係做到硬。
皆因為唐唐命格非常之有殺氣。D網民都識得將佢亂改花名，話叫做「英年早逝」，咁英年一出，冇錯，自己生勾勾，梗係要搵一個人早逝賀喜，同佢做個滿堂紅。今次我國最親密盟友話事人同志，升天之齡只不過係英年六十九歲，連七字頭都未見，可謂年富力強，而且事前全無跡象，聽講最近兩個月肥肥白白，食得、玩得、跳得，生命力仲健全過部最新出版之iPhone4，一撻就著，畫面清晰，樣樣分唇齊全，又點會突然間hang機呢？
所以，英年一出，有人早逝，花園街九條人命已經證明，你唔信邪，依家又整多一鑊。咁點解唐唐做咗咁耐，由局長、財爺、政務司長，自己反而一路冇事？
E一點，更加容易解釋。唐唐以往官運亨通，都未試過咁有殺氣，唔係胡定郁話齋腳頭好，財赤變成盈餘，失業率神蹟下降，係因為好似細路哥咁，未曾脫穎而出。依家唔同嘞，正式割包皮，發育完成，紅噹當咁出場，你話有乜法子唔勁抽呢？
所以話，香港藝術博物館館長丁新炮，點解今次唔上台挺埋唐唐？若果炮哥可以召集香港考古人士，莊嚴宣布，話喺正東方位，清水灣邊發掘遺物，發現一塊巨石，上面用秦代篆書寫住個「唐」字，在唐唐造勢之日，搵幾個咕喱將塊石碑抬上台，正式同唐唐開光，咁就勁過放Video幻燈片，係未？周一、三、五刊出