李嘉誠發聲

2013年12月02日

十一月二十八日下午，左丁山走入中大校園，參加中大展覽廳嘅開幕儀式及入內參觀半世紀以來嘅展品。在此場合，當然唔可能聽電話，點知三時過後，不斷收到WhatsApp，話商界巨人李嘉誠發聲，好有新聞價值喎。卒之五點鐘出到火車站，記者G來電話已買到一份「南方都市報」，係「便利店內最後一份」。呢份平時冇乜人理嘅報紙，在便利店放在一堆其他報紙中，並不顯眼，俾錢時，收銀員問記者G：「點解今日咁多人買呢份報紙？」記者G話：「有李首富大頭相在頭版吖嘛！」
記者G唔話得，又上網，又scan，將南方都市報及南方周末報訪問李嘉誠全文電郵傳送過嚟，李先生點解突然間願意接受內地報紙訪問呢，一時之間，猜測唔到，左丁山素來認為名人談話不須過份追問動機，最緊要係追查其談話內容是否有內涵，是否合邏輯，是否有道理。
以本身係市場派嚟睇，左丁山最欣賞首富下列一段談話：「自由開放的市場，重視『原則』和『法治』，兩者皆來之不易，但如果管治失當，也可以一夜之間蕩然無存。
至於福利化社會是否適用香港？關鍵是，我們要有選擇，要大家扶貧，也要自願，只能使用引導的方法；我相信，香港人一向熱心於慈善，樂意助人，對我來說，幫助低收入人士是義不容辭的事；但如果政府政策錯誤，不能解決社會缺乏上進機會的問題，只向有能力的人開刀，這是錯誤的，因為香港人都想創富，政府的角色，應該要令人人有創富的機會，而不是等待『打救』。」
「健康社會中政府與企業的關係是息息相關的。關鍵是政府的權力要在法治的基礎上公平公正地落實執行政策，香港不能『人治』，永遠不能選擇性行使權力。
我與香港或各國政府的關係都是建基於此的，不會因個別領導人或官員的變動而受影響，最重要是政策要令商界有信心。」
香港不少商人只識做生意賺錢，但對市場、自由、法治、干預各理念之相互影響，完全不懂，李嘉誠之言，可以做商人教材。至於本港政界中人有無敏感人士對號入座，則非吾所知也。

野生鮮魚難求

2013年05月28日

習近平批評奢華之風後，聽講內地吃鮑魚、魚翅、凍蟹腳、響螺之習慣暫時失蹤。一位在深圳經營高級豪華潮州菜嘅老闆向香港好友講：「死啦，習，習，習主席上台後，我間酒家生意少咗四成，而香港間老店食客都素來只係食中價貨，我倉裏面嘅鮑翅積積埋埋，唔知點算好。」佢本來想叫「習總」嘅，但唔敢叫出口，於是改番做習主席，以後大家就係咁樣稱呼佢。
好友話：「我地捱義氣啦，你五折清貨，我搵幾十位朋友到深圳食！」講笑咩，朋友唔係負責發酒牌嘅警官噃，邊度會有大折扣。
左丁山不吃蝦蟹已久，有一件事最唔明白，為何潮州凍蟹腳可以賣到咁鬼貴，一隻要賣成千二蚊，一圍枱十二人，淨係食響螺與凍蟹腳，已經要兩萬幾銀，潮州富豪C亦話「吃不消，咪搞！」照睇，凍蟹腳無汁無味，點樣賣得咁多錢呢？望識者可以教我。
東星斑就時時食呀，但唔駛睇香港大學發表研究，廚師已經可以話俾你聽，真正野生深海東星斑係幾難搵嘅，一般食肆賣嘅係養魚。上次左丁山在曼谷香格里拉香宮食清蒸筍殼，一吃便知道是養魚，唔怪得個個侍應只係介紹油浸筍殼，左丁山笨咗一次，以後識做。但吉隆坡之「天外天」酒家（每晚人客排長龍）嘅清蒸筍殼的確係冇得彈，睇怕「天外天」嘅野生筍殼供應亦可能在將來慢慢斷線。華人雖愛好吃海洋生物，十年八年後全世界只會有漁排養魚供應，漁民本業變成養魚，不是捕魚，總之中國人鍾意嘅東西，無論海上之鮮，地底下之金銀油鐵礦頁岩氣，地面上之雞牛豬羊等，統統會長期價格向漲，中國嘅製造業採購經理指數（PMI）一話下跌，低於預期啫，港股就跌591點，日經跌1143點（五月廿三日），可見中國需求之上升下跌足以觸動全球市場神經。建築邦嘅表弟鍾意周末租艇出海打魚，上次去吉澳以外海面捉到一條幾斤重嘅黃花魚，還未諗掂是晚搵邊幾位親友享受之，已有五星紅旗嘅漁船駛埋嚟，高呼出價七百五十元人民幣買走條黃花，表弟本來心郁郁，但想起吃新鮮黃花魚嘅鮮味，心癮難頂，卒之唔肯賣。


左丁山

適度干預

2013年05月27日

曾蔭權當政之初，猶自遵守「積極不干預」，只講大市場、小政府，到了權力鞏固之後，意氣風發，就開始講如何符合國家規劃，政府要做市場方便者（facilitator），必要時推動市場一把，但佢畢竟係夏鼎基徒弟，有意離經，不敢叛道，故此雖然推動成立最低工資，成立競爭法，還是抗拒直接干預市場。
梁振英就冇港英包袱，有社會主義思想訓練，滿腦子經濟思維都是政府指導，政府可以成為game changer（改變遊戲的人），開口埋口就話要做有為政府，要有適度干預，故此競選時冧得民建聯/工聯會以至泛民好歡喜，以為選佢好過選一個親近資本家嘅唐英年。選委的最後投票取向當然極受阿爺影響，但民建聯、工聯會、泛民加埋起來為佢間接抬轎，貶低唐英年，則無可懷疑地，係在民望上抬高咗梁振英，令佢可以在阿爺面前搶分。
梁振英果然從後趕上，氣走唐英年，依家一年過後，啲選委後悔未？啲挺梁市民後悔未，且再看看梁先生之明顯適度干預政策：
（一）強壓房屋需求，用SSD、BSD、DSD令到本港一手市場成交額立即跌至一潭死水，市民賣樓、買樓，同樣困難，於是銀行、律師、測量、搬屋、裝修各業立時冷卻；（二）本港奶粉本無事，庸人自擾之，為咗兩隻暢銷奶粉而推出限奶令，害苦了其他奶粉及香港自由港聲譽，甚至與內地交惡；（三）將曾蔭權雪藏咗嘅天水圍墟市個案實施，以為執到寶，在天秀墟開辦墟市，搵東華三院孭鑊做管理，結果一如左丁山所料，上當嘅係簽約擺檔嘅小商販，現時天秀墟管理欠佳，生意慘淡，話威脅吓領匯商場喎，點知天水圍市民知道點樣揀，邊個會特登幫襯天秀墟吖。東華三院係搞醫療嘅，唔係搞墟市，快啲劈炮好過。天水圍邊度有錢搵，市場當然識做，試睇吓天瑞路俊宏軒廣場嘅食街就知。（四）林鄭月娥帶落嚟嘅中環街市保育，至今未開工，成本當然會嚴重超支，他日在此出現嘅游泳池會係世界最貴嘅游泳池，俾外傭享用，（好彩市建局卒之知死，上星期刪除咗！）暫時寫住咁多先，張震遠之商交所聽講亦係曾蔭權時為政府適度干預嘅產品，本地薑周文耀為港交所拒絕開辦之後，海歸派張震遠以為執到寶，致有今日！

一年前預見

2013年05月24日

張震遠嘅香港商品交易所唔掂，向證監會交回牌照，再引來警方調查，弄出政治風波，梁振英當然大受打擊。商品交易所生意少，蝕到喊，非自今日始，左丁山查番本欄剪報，查到2012年1月31日，本欄講商品交易，曾引述金融Ｌ，有以下一段：
「金融Ｌ話：『好難講，香港炒期貨，幾十年來炒唔旺，無內地企業參與做對沖嘅話，始終係成交太淡靜，吸引唔到本地炒家入市。內地企業做對沖好，炒單邊好，到目前為止，都係在LME（倫敦金屬交易所）或CME（芝加哥商品交易所）玩，睇唔到香港點樣可以爭取到大生意。𠵱家張震遠檔商品交易所嘅交投靜得可怕，經紀生意甚少，但開大咗個頭，張主席都唔知點收科。佢當初話搞燃油期貨，在內地交收，但內地唔批准，現在只有黃金交易，但成交額完全唔係金銀業貿易場嗰皮！咁搞法，我地行內人都估緊HKMEX究竟蝕皮費可以蝕得幾耐？』」
嗱，蝕得幾耐呀，咪蝕到今年五月十六日囉，之後就趁長周末宣佈交回牌照，與客戶平倉，而平倉合約少得可憐，得181張，可見其生意之慘淡。金融Ｌ年半前已預測中晒。
現在市場質疑（以資深華資經紀，詹培忠老友張華峰議員代表），其他經紀遇到資金不足，資本不足嘅情況，好快就會被證監會釘牌，點解張震遠嘅商交所可以拖咁耐，仲由得佢自動交回牌照㖭？另一派意見就話經紀過往爆煲，多數因為生意太好，如資本不足，容易傷及無辜客戶，故此證監會要吼到實，但張震遠嘅商交所剛好相反，係生意太淡，客戶寥寥可數，說不上要「保護投資者」，故此證監會較為容忍。但無論如何，資本不足即受證監會警告，乃是大原則噃，證監會可唔可以有兩種解釋呀。證監會砌雍澄軒表現勇猛，對商交所則好似高歌一曲「心太軟」，事實上係惹人思疑嘅，更令人不解嘅就係行政會議居然在星期二不開會，理由是沒有議程，簡直係天大笑話，無議程啲局長全去咗放假呀？香港社會經濟太平穩定到政府無事可做呀？與張震遠無關係呀？搵你信！梁特首以勤力著名，行政會議突然放假一天，確匪夷所思。

唯恐見頭版

2013年05月23日

商交所執笠，聽聞首先係自動引爆，以免受證監會逼令「撤回」（revoke）牌照，隨時弄出政治風波，令梁振英尷尬。你知啦，梁先生就任特首之後，掛住「打好呢份工」，除咗上京入內地之外，甚少外訪，但就任將近一年，都要出去見吓人㗎，以前曾蔭權去外國見人地國家領導人嘅噃。六月中，梁特首訪問美國，到紐約見市長彭博，三十幾位中外商界人隨行以壯聲勢，並且可能在隨行商家中選一位出任下屆貿易發展局主席。
在此時刻，張震遠之商交所事件，本來最緊要迅速淡化，淡出，唔好發生任何「醜聞」，俾蘋果煲大，點知內情複雜，警察商業罪案調查科加入調查，張震遠難靜雞雞收科咯。報界在上星期四晚已聽聞證監會可能就商交所牌照發出新聞稿，但內容不知，報界等到截稿時間，證監會仍然冇動靜，到咗星期五佛誕假期，據聞有幕後集資拯救、撲水行動，但卒之冇人願做白武士。到咗星期六，張震遠約見部份傳媒，消息一傳出，商交所唯有宣佈自動放棄牌照，即時生效。發放新聞都有時間考慮㗎，在周末假期，再加上湯顯明到立法會作供嘅新聞，好有可能遮掩商交所失利嘅消息嘅，但咪一樣上咗頭版！
湯顯明新聞冚唔到商交所執笠，係因為湯顯明並無爆炸性洩秘，雖然做過大官，湯顯明唔知係唔係精神壓力太大，呢次公開露面，在立法會似是一位怯場新丁，講說話吞吞吐吐，支吾以對，有時逐個字講，顯出心情恐慌，全無大將風度。因律政司已批准廉署內部成立特別調查隊，由現任專員白韞六掛帥查湯顯明，湯顯明自然輸了陣勢，但俗語話「輸陣不輸人」，佢可以擺出一個「自反而縮雖千萬人吾往矣」嘅態度，講說話大聲啲，決斷啲，勇猛啲，顯出一個曾任紀律部隊首長嘅威猛形像，但依家在立法會俾人睇到佢似乎係一個被警察拘留，搵埋律師到警署簽保嘅縮頭小人物，令人失望到極。今時今日，廉記案件唔止係法律程序戰，亦係公關大戰，最佳例子就係陳志雲案，陳志雲慘被電視城遊街示眾，但佢創先河見傳媒，講一句「假的真不了，真的假不了」，立即挽回陣勢，湯顯明有冇咁嘅guts？

商交所執笠

2013年05月22日

張震遠創辦的香港商品交易所停業，向證監會「投降」交回（surrender）牌照，十分冇面。梁振英競選特首時嘅核心內圍分子曾被壹週刊稱為The Losers（失敗者），又多一個例證。張震遠嘅紙上「哥利」十分巴閉，憑電腦學士（一級榮譽）與哈佛MBA銜頭，已足夠打入麥肯錫做顧問，恨死其他大學畢業生。但香港係一個「奇怪地方」，哈佛MBA加麥肯錫，雖然係24K金漆招牌，但一旦離開麥肯錫到香港其他企業就業或創業，就唔見得有幾多好特別成功故事噃，香港商界絕對係睇真正實力與具備街頭智慧嘅人物嘅，對哈佛及麥肯錫雖然崇拜，但只會俾呢類天之驕子最多兩次機會嘅啫。
張震遠離開麥肯錫（1994）之後，做過石油公司、資產管理公司、石化公司總裁，業績平凡過平凡，係自2007年出任市建局主席之後，先至在政壇開始有名，不知何故，被梁振英睇中，成為後來梁營核心之核心，出任競選辦主任。
2008年張震遠拉攏各方，成立香港商品交易所，期貨界人士無人睇好，商交所搞期金，面對金銀業貿易場呢間百年老店，完全唔夠爭，港交所後來又推出期金，更令商交所冇碇企。商交所最大希望係做石油企業，在內地建立石油倉庫處理實貨交收，但石油係國家戰略物資，張震遠雖然靠攏梁振英而在政治上令中央望吓佢，畢竟中共最睇出身，而佢係國民黨名人（港九各界救濟調景嶺難民委員會主任）張寒松之子，兼且張寒松又係「中國文化協會主任」，專責資助本地反共文人與中共統戰對着幹，故此張震遠欲在內地搞石油，唔係想像中咁容易。呢，中華總商會張永珍做石油生意，就順風順水嘞。商交所開張不久，已經缺乏真正買家賣家與炒家參與，成交量低，傳媒絕少報導，公關工夫少之又少，搞期金喎，炒金大市場在於金銀業貿易場，但另一位梁粉張德熙係金銀業貿易場理事長，佢雖則學歷與張震遠差甚遠，但勝在有實戰智慧精通黃金吖嘛，空議論嘅哈佛，麥肯錫書生根本唔夠佢砌，張震遠想靠黃金突圍，有咁易咩。去年競選激烈之時，金融界已傳出商交所嘅日子有限，能捱到上星期，唔多唔少要多謝梁振英當選。

英國曾經停步

2013年02月26日

桂中樞攜眷離開上海到港年代，北角英皇道住滿上海人，初時海派生活如舊，北角麗池夜總會就是海派為海派人士而設的，本地廣東人仲係幾老套吓，唔識得太多西式生活。當時全世界最有錢嘅國家係美國，美國奶粉大量運到，在教堂派發，信者得救，救肚皮也！左丁山一位姨丈，飽讀詩書，曾經有個錢，毛澤東在天安門站起來，佢就來港做難民，住在深水埗，帶住仔女，日日為生活煩憂。五十年代石硤尾大火後，成為第一批徙置區居民，有時見到佢，佢摸住左丁山個頭，苦口婆心咁勸告：「你好似唔夠飯食咁樣，星期日去教堂聽耶穌啦，有牛奶，有奶粉派！」左丁山問：「聽耶穌講乜？」姨丈話：「講基督教，講做人道理，做一個好人。」左丁山又問：「你上次對我地講孔孟之道，成仁取義，有乜唔同呀？」姨丈幾乎含住泡眼淚咁講：「講仁義道德冇飯食㗎，講耶穌就有奶粉牛奶攞，你乖啦，去教堂啦！」之後掩鼻而走，嗰一幕，左丁山至今難忘。
天地有循環，今天香港已是世界上名列前茅嘅城市，Hong Kong係一塊國際上響當當招牌，昔日難民之子袁天凡豈止捐錢回饋母校華仁書院，仲捐過唔少錢俾另一間母校芝加哥大學㖭。英美名牌大學嘅校長每年都會訪問香港，向本地有錢人募捐。整個亞洲正在興起，英國首相金馬倫明槍明刀搞官商勾結，帶百幾間英國公司高層訪問印度，甘心做英國頭號推銷員，搶印度訂單。一位王肇之先生在《蘋果》評論版話：「香港變了，那個普遍貧窮的年代結束了。香港不再爛命一條，香港今天身嬌肉貴。」王先生不知年齡若干，如果佢係80後或90後年青人，恭喜佢啦，因為佢嘅爸爸可能係比佢爸爸個爸爸更有錢，先至講得出「香港今天身嬌肉貴」之言。維多利亞年代嘅英國人夠身嬌肉貴喇啩？英國首相Gladstone何須帶領商人去訪問殖民地印度？牛津校監點會嚟香港求捐款？當英國國力不再相對強盛，英國經濟給其他各國趕過，英國工商業不再具備競爭性之時，英國首相咪唯有親身到印度苦求印度訂單，低聲下氣招呼中國遊客囉。香港今天年輕人靠上一代苦拼得享富庶社會生活，「幾兄弟妹搶食月餅不再是新一代人普遍的集體回憶」咯喎，幾好吖，左丁山無異議，但因為咁而認為香港應該停一停步，尋找昇華，唔該佢地慎防再下一代嘅仔女要搶食

節儉過度

2013年02月11日

習近平掌管中共黨中央後，不斷下達批示，要煞停公款消費，官員不得大吃大喝，爭取豪華享受，須廉潔自守，拒絕飯宴紅包。
黨主席如此說，主席以下各機關紛紛跟風擦鞋，新華社發稿談「舌尖上的浪費」，習主席立即批示「節約光榮，浪費可恥」，於是蛇年年關變成各省市領導的「廉關」，啲五星級豪華酒店嘅白酒、禮品、花籃，年夜盛宴嘅訂位訂購，紛紛「被取消」，全國興起「光盤行動」（即要每碟食光，不留廚餘），睇嚟起碼有一年半載，內地高檔消費會大受打擊。至於呢股政治性「節約反浪費運動」可以維持得幾耐，就要睇習近平嘅政治能耐。
新年在家搵書讀，找出新亞大師兄宋敍五（新亞經濟1961）著作三本：（一）《清朝乾嘉之後國勢衰頹的經濟原因》，與趙善軒合著，樹仁學院出版（2004）；（二）《西漢商人與商業》，新亞研究所發行（2004）；（三）《西漢的農業與土地兼併問題》，新亞研究所（2011）。中國自乾嘉以後，經濟與國力一落千丈，受盡歐日打擊，究竟歷史原因為何，宋先生本書有經濟數據解釋。
第一係人口增加，西漢時（西元2年）中國人口有五千九百幾萬，到明朝末（1626），人口係五千一百三十五萬人。一千六百餘年之間，中國人口不增反減。清代由順治至嘉慶，百餘年間境內無大戰亂，人口大增至三億三千二百萬；（二）人口大增，導至米價大升，一百多年間升咗五倍，絲綢棉花價漲上漲，但與此同時，因人口增多，生產方法不變，生產力下降，工資下降，康乾盛世之時，已埋下社會由治入亂嘅伏筆；康熙與雍正雖然英明，但呢兩個皇帝以節儉為名，裁減國營工業，大力削減宮廷及政府嘅物料採購，不准發展工業，雍正禁止礦業，於是明代工藝傢俬業不存，全國地區織造廠裁撤，宮庭採購物料極度縮減，民間工藝業由盛轉衰，同一時間，英國發生工業革命，於是道光以後碰上歐洲商業貿易衝擊，中國就難以應付，卒一敗塗地。康熙與雍正過份強調節儉，原來害了中國，今又見習近平上台後不斷講節儉，雖則今昔局面大大不同，難以一概而論，還是不宜過度表態跟風。


左丁山

奶粉焦慮症

2013年02月04日

有教授議員買奶粉，由銅鑼灣買到筲箕灣，又有人指奶粉由將軍澳去到東涌，好似全香港出現奶粉荒，全港B B缺糧咁款，搞到食衞局局長高永文醫生「精神分裂」，政府宣佈限制奶粉出境，每人只准帶兩罐。又有葉劉淑儀議員急到要用/修訂儲備食品條例，將奶粉視同為食米，由政府管制儲備。
��家有世界大戰咩，駛唔駛咁緊張呀，小Y Y剛為人母，老早決定餵母乳，輔以少量奶粉。問佢老公：「是否要撲奶粉撲到去沙頭角？」佢笑笑口答：「我揀咗一隻牌子，周圍有得賣，樓下百佳有大把。」秘書Ｖ姨甥女幾個月前產嬰，問佢買唔買到奶粉，佢話：「我選咗澳洲奶粉，一啲麻煩都冇。」家庭醫生Ｃ在銅鑼灣開診所，兩個月前做咗外公，問醫生Ｃ：「你身為醫生，買奶粉有冇問題呀？」醫生Ｃ話：「一啲都冇，俾市價就一定買到，驚都未驚過！」
點解TV、報紙好似發神經咁報道奶粉荒，左丁山啲朋友就完全無此憂慮？呢日撞到名嘴Ｃ姐，佢話：「哎吔，我聽聞只係有兩隻牌子Ｍ牌與Ｆ牌嘅初生嬰兒奶粉俾人搶購啫，其他牌子及六個月大以上嘅B B奶粉根本不愁供應。」吓，為咗兩隻牌子奶粉就搞到滿城風雨？如果Ｍ牌及Ｆ牌市場佔用份額太大，啲媽咪點解唔改用藥房、超市內滯銷嘅奶粉而要左撲右撲，搞到全家為B B奶粉負上「焦慮症」，精神分裂？
問一位嫲嫲，佢個孫已有三歲，唔再食奶粉咯，身為過來人，佢大罵左丁山：「你邊度識得湊B B吖，食奶粉唔好成日換呀，B B會唔慣，好扭計㗎，你未湊過唔知辛苦，食開Ｍ牌好，就一定要繼續食Ｍ牌，唔好轉換其他牌子！」俾佢鬧完，左丁山條氣唔順，轉問醫生Ｃ，醫生Ｃ講：「梗係換得奶粉啦，啲媽咪唔識啫。」問中環名醫Ｋ，名醫話：「我唔係兒科專家，但憑我常識，嬰兒食邊隻奶粉都一樣，你不妨問吓專科專家！」於是打電話問兒科大教授，教授大笑：「邊隻牌子奶粉難買到，咪轉奶粉囉，我見盡咁多奶粉，內裏原料材料幾乎全部相同，無論食邊隻都冇分別，只不過啲媽咪怕麻煩啫，買唔到暢銷Ｍ牌就轉買滯銷X牌，包冇奶粉焦慮症！」

秘書學校式微

2013年02月03日

中環堅道聖心商學書院聞名已久，估唔到有108年咁耐。聖心商學書院以前為喺中五會考後，讀唔到中六嘅女生提供另一職業培訓捷徑。在電腦未曾淘汰大量工種前，女生讀完商科班，搵工好易，做OL而識得打字、簿記、速記、秘書事務，競爭力大過一般中七畢業生好多，在中環寫字樓做秘書，聖心及Sara Beattie算係名校搖籃。
不過做打字、速記、秘書呢行，自從有咗互聯網之後，已逐漸式微，一間大集團總部幾十年來都有一個「打字部」，現時呢，打字員走一個就少一個，由高峯期十幾二十人減至得三幾個，相信佢地退休後就會冇咗呢個部門。電腦科技與互聯網飛躍發展，新一代行政人員人人識上網，識自己打字寫文件，搵秘書做可能仲慢幾拍，加上科網股爆破後，全球大公司厲行節省人力資源，盡量壓縮職員數字，行政人員開始幾個人共用一位秘書，商行寫字樓對秘書、打字員嘅需求銳減，名校出身嘅商科文員見到搵工不易，呢啲學校嘅學生人數自然日減，故此108年歷史嘅「聖心」要關門大吉，並非意外。
百年老店，難敵時代潮流，非只聖心一間，早前HMV宣佈破產啦，前幾日美國大書店Barnes& Noble又宣佈削減分店計劃，無非都係掙扎求存啫。同一時間，阿瑪遜網站宣稱會將網上得到一億八千八百萬個「活躍客戶」嘅資料「個人化」，向廣告商爭取「目標性廣告」（targeted ads），此舉有侵犯客戶私隱之嫌，但阿瑪遜遊走於灰色地帶之間，相信美國消費權益團體搵唔到甚麼辦法去阻止。事實上，我地一上阿瑪遜網站購物，交出信用卡號碼去付款，甚麼私隱已自動奉上，諗番轉頭，香港嘅私隱專員仲話修訂公司條例，禁止查冊太方便，以保護公司董事私隱，都算係自欺欺人。阿瑪遜橫掃HMV、B&N呢類老店，乃時代之必然，香港聖心商學書院在20世紀初期創辦，係意大利傳教士之了不起，劃時代嘅遠見，經歷咗一個世紀，算係完成歷史任務，關門就關門啦，不必留戀。

襟弟妹夫

2012年12月24日

李純恩嘅親戚在金鐘地下停車場遇上匪徒持「槍」打劫，《蘋果》指當事人容潤笙係李純恩嘅妹夫，以前在李純恩攝影展覽開幕禮，左丁山見過容先生，知道佢係李純恩嘅襟弟，不明白報紙何以指佢係李純恩妹夫。
左丁山對記者朋友Ｇ講：「襟弟與妹夫唔同嘅噃，唔可以稱呼錯。」點知記者Ｇ突然問：「襟弟即係邊個？」左丁山答：「譬如你有一個細妹，你細妹嘅老公就係你丈夫嘅襟弟囉！」記者Ｇ仍然不解：「我細妹嘅丈夫咪係我嘅妹夫囉，我嘅妹夫，老公都叫佢做妹夫嘅啦！」跟住問坐在隔籬飲茶嘅小Ｋ（平板設計師），小Ｋ亦話：「係囉，咪妹夫囉，乜點解叫襟弟？」
左丁山一時唔知點樣回答，今日之80後對中國傳統稱謂，好似無心裝載，學足西方人叫uncle、auntie，分不清伯、叔、舅、嬸、姑表、姨表、堂兄弟等等分別。有一次遇上一個好大嘅家族嘅，即係世家子弟後人，佢話佢有好多cousins，講啲名字出嚟，確係好出名，但左丁山問佢究竟係父系、母系邊一方面嘅cousin，邊啲係堂兄弟妹，邊啲係姑表姨表，講唔出，總之一味係cousin，無法啦，佢自幼留學讀英國寄宿學校，邊度識得呢啲嘢噃，但記者Ｇ呢類本港土生土長學生都對傳統稱謂冇足夠常識，咁至令人驚奇。
記者Ｇ反問左丁山：「你講嘅，讀書冇得讀嘅噃，先生從來唔講，你點解又識呀！」諗咗一輪，左丁山先至記得小學時候有尺牘一科，教我哋寫信，學習「父親大人膝下敬稟者」之類，於是學埋令尊、家父、令郎、令千金、外甥、姨甥，種種稱謂，後入社會做事，總會買本「應用文」傍身，以應不時之需，久而久之，就會記得，不會搞亂。之不過，講究呢啲嘢，大概會俾人笑係老餅，又搵唔到錢嘅，講嚟做乜，現實啲，講吓股票編號（冧巴）好過，譬如舊年識得買823，現在已經盤滿缽滿，買到隻669，亦到收割時候，反之買咗330就欲哭無淚，記者Ｇ一位朋友對左丁山講：「阿叔你無謂教我哋甚麼襟兄弟與姊夫妹夫之分啦，不如俾冧巴我哋最實際！」神仙咩，事後孔明，總係叻過事前鬼谷子，有外籍人士上法庭申請禁制某中大統計學教授使用「贏馬數學方程式」，如果真係有咁嘅方程式嘅話，就係天下第一營生啦！

中國軟實力

2012年12月06日

外貿Ｙ最近趁熱鬧，諗住不少廠商走咗去緬甸視察，驚住執輸，自己搵綫路安排咗一個東南亞之旅，先去齊越南、泰國、柬埔寨、寮國，最後到緬甸仰光，雖然行色匆匆，只係打一個白鴿轉，但佢認為值得，起碼知道若干情況，收咗一啲咭片，以後再去有生意可做嘅話，總算搵到一個起步點。
外貿Ｙ早前聽到紡織Ｔ講，緬甸工人薪資比東莞便宜好幾倍，土地更加廉宜，如有必要，可將工廠搬過去。外貿Ｃ去完返嚟對左丁山講：「到緬甸投資，唔係冇得諗，但我隱約得到一個感覺，當地人對中國人嘅好感不大，反而見到奧巴馬飛擒大咬咁款攬住昂山素姬錫一啖，緬甸人就好受落。豈有此理，中國支持緬甸幾十年，投資數以百億計，緬甸一旦推行政治改革，打開道門，就鍾意美國人多過鍾意中國人，對我講，中國只係『承包商』（contractor）啫。美國先派希拉莉，後有奧巴馬到訪，磅水唔夠九億港紙，咁就冧到緬甸上下暈陀陀，認真本小利大，中國經營緬甸數十年，現在好似變成係冤大頭，請問道理何在？」
左丁山點識答，呢啲嘢，請問王賡武教授或者有答案。外貿Ｙ亦發覺越南、柬埔寨、寮國對過去殖民地主人法國仍有好感，雖然呢幾十年接受中國不少好處，仍然有抗拒中國之意。談到軟實力呢回事，外貿Ｙ慨嘆中國大大輸蝕，用幾百億美元都買唔到。大家講吓講吓，搵到一啲表面原因，例如共產黨執政嘅中國不崇尚自由民主及言論開放，從來只與當權獨裁派，高高在上人士打交道，交換好處，普通人民未必感受到中國經援對佢地有何好處；此外，整個東南亞華僑係商界中堅，生活比較好，賺錢比較多，惹當地人所忌，認為中國人剝削佢地；三來，中國係十三億五千萬人大國，東南亞國家不論人口論面積，就似係一隻小貓住在一隻巨型老虎隔籬，心理上有恐懼症，非自今日始，中國經濟愈係龐大，佢地愈係驚青，直覺反應就係前門拒虎，後門搵隻狼（美國，西方）入屋幫幫手，頂住吓先。
外貿Ｙ加埋左丁山只係兩個臭皮匠，及不上一個諸葛亮，有識之士對中國軟實力為何不如人之事有研究者，請指教。

泰國米

2012年10月30日

上星期睇BBC新聞，講到泰國出口總額大跌，食米出口跌咗44%，點解跌得咁多？因為泰國政府（女總理英祿）有競選承諾，要向泰國農民以每噸15,000銖收購白米（約490美元），但此價大大高出國際價格，泰國米商出口泰米有困難，於是啲米唔駛出口啦，政府收埋咁多米，出口唔得，在國內銷售會擾亂市場，壓低零售米價，政府蝕到喊，兩樣都唔掂，結果就係政府屯積大量白米，要周圍搵倉庫儲米，連廊曼機場（舊國際機場）嘅飛機庫都成為米倉。
政府津貼農民，以高出市價買農產品，並非泰國獨有，美國農業部最近就買入大批穀物，支持中西部農民。日本自民黨當政年代，農業政策大力向農村農民傾斜，法國農民視領取政府資助為理所當然，故此他信細妹英祿用高價買米呢一招嚟收買農民選票，只算係從先進民主國家偷橋，並非天才發明。
政府津貼產業一定會衍生「貪污、攞着數、無效率經營」，在泰國呢啲貪污風氣甚盛嘅地方，政府高價買米就產生嚴重問題，破壞經濟體系嘅正常運作。商人A最近去泰國考察貿易行情，對屯積泰國米略知一二；商人A對左丁山講：「泰國政府用15,000銖買一噸米，呢啲米跟住存入政府倉，好快就有人以出口到外國（G2G）名義，向貨倉提走一批米，名義係出口到柬埔寨，其實係利用虛假出口文件提貨，啲米一出咗貨倉就另外有人以農民身份，換過包裝，再賣畀政府，如是者一噸米循環賣兩三次，都唔知邊個呃邊個，是否集團或詐騙，無從稽考矣。英祿以為高價買米有利農民，其實更有利於『騙米集團』，拿納稅人嘅錢來較飛！」唔好以為呢啲事只會在泰國發生，大有為政府用公帑派俾某一個產業，就會誘發犯罪集團動腦筋、鑽空子，經濟學概念話俾我地聽，走私乃跨境價格差異之必然後果，尤以發展中國家為然，泰國政府偏離市場價錢向農民買米，想話唔益非法集團呀，幾難咯。一啲新上台政府要做「有為」，要「適度干預」，要放棄「大市場，小政府」理念嘅，唔該多啲瞭解現實。

程序制約

2012年10月27日

政務司司長林鄭月娥在香港公共行政學會午餐演講，提及廉政公署、申訴專員公署可能影響政府之行政能力。此言一出，立即備受各方抨擊，指林太唔正確認識香港價值。

左丁山睇番林鄭之英文演講詞，睇唔到佢有貶低廉署、申訴專員之意，頂多係呻吓啫，不過今時今日，任何一位CY內閣人選，呻吓廉署都有罪，實會俾人鬧嘅嘞。其實林鄭並非錯到離譜，佢只係漏咗加上一句：「廉署及申訴專員係政府行政效率之最大制約。」經濟學概念經常講maximisation subject to constraints（在有制約條件下最大化），讀過初級微積分就會知道，在一條方程式尋求最大值（maximum value），如無制約（constraints），最大值會係無限大，在政治上，政府權力如無制約，或制約被削減至最低、最少，政府權力就會絕對化，跟住政府絕對腐化，最佳例子就係蘇聯史太林、中國毛澤東、德國希特拉時代，呢三位大魔頭無人可制，三人擁有絕對權力，於是禍國殃民。委內瑞拉總統查韋斯有少少類似，做咗八年總統之後，因在國會擁有絕對大多數，索性修改憲法，將總統兩任制改為無限期連任制，今年已經係第十二年做總統，如果今次大選得以連任，就會做夠十六年，可以為所欲為。

以前左丁山在本欄不止寫過一次，董建華特首時期，政府效率不高，成日埋怨公務員做事慢，其實公務員做事慢，正是因為香港有ICAC、有行事程序，公務員嚴格遵守程序為本，目標為次之故，一旦改為效率第一，目標至上，程序為次，公務員就好容易俾ICAC拉去坐監嘅嘞，所以香港人如要維持正確價值觀，就不應動輒批評官僚主義做事太慢。梁振英來自商界，慣咗做事嘭嘭聲去馬，但掌管政府之後就要放慢，緊跟慣常程序，明白ICAC，申訴專員，平機會，私隱專員等等係政府效率最大化之不可少的制約。啲立法會議員，有時要政府做事快，有時猛烈批評官僚主義，皆因佢地唔明白香港係程序治港，遵守ICAC規則！

鯊魚周身係寶

2012年06月14日

昨日講到收到一本內地雜誌「銷售市場」（2012年四月號）就係呢位朋友寄嚟嘅，佢叫左丁山讀一讀第十八頁至二十一頁嘅「禁翅：被操縱的民意」，作者係習熠，北京智嘉勵合營銷顧問有限公司合夥人。作者講2006年8月3日，姚明在上海記者招待會呼籲不吃魚翅，後來在2009年，美國野生救援協會（ Wild Aid）搵姚明賣一個廣告，姚明大頭相之旁，有一句口號：「沒有買賣，就沒有殺害」，呢個廣告轟動中國，引起食翅與禁翅之爭，食翅成為背後反華之手，在多倫多市藏翅等於藏毒，華人食翅等於吸毒罪犯，在美國吃翅是那幫「搶走我們工作。最新富起來的，喜歡開奔馳和寶馬的中國人；在中國，吃魚翅的是那幫大腹便便，窮奢極欲，沒有社會責任感，盜竊社會財富的商人和收入來源不明者。」於是中國大陸常見兩位好友為吃不吃翅而吵得面紅耳熱。
中國人喜歡食翅，香港則是世界最大嘅魚翅交易中心，但捕鯊並非中國生意。世界上捕捉鯊魚最多嘅，根據互聯網上搵到嘅資料，歐盟國家漁民捉鯊魚最多，世界農糧組織（ FAO）2004年數字，歐盟該年捕捉鯊魚109.121公噸，其中西班牙佔咗40%，法國佔19.5%，英國佔14.6%，葡萄牙佔6.5%，西班牙、法國、意大利三國每年輸入嘅鯊魚肉佔全球份額四成以上。原來歐洲人（尤其是收入不高者）吃鯊魚肉十分普遍，用鯊魚抽取魚肝油，用鯊魚皮製造手袋、首飾、皮包，在法國盛行。 FAO話北美與歐洲人自四世紀開始已開始吃鯊魚肉，但魚翅由於中國人鍾意，最為值錢，以前被歐洲漁民當係草，二十世紀中葉後就當係寶，近二十年中國人富起來，魚翅更加值錢。實際情況如此，即使中國人不吃翅，歐洲人還是會繼續捕殺鯊魚，鯊魚有幾百種，聯合國列為禁捕者只有三四種，魚翅只是歐洲人吃鯊魚肉、提煉魚油之副產品，我地食翅豈能相等於吸毒！如要禁翅，唔該聯合國 FAO下令歐洲國家不准捕捉所有種類嘅鯊魚。


左丁山

港大學生會有種

2012年03月21日

香港大學學生會據說有大量盈餘儲備，「南華早報」提及一個數字，就係三千萬元，認真巴閉，比其他大學學生會富裕得多，如果簡簡單單一早買咗「領匯」，一年收股息已經有百幾二百萬，多過每年會費收入，正是有錢好辦事，用三十八萬幾嚟賣廣告，負擔得起有餘，只要學生會內部對賣廣告有討論，有決議案，又得評議會財務委員會通過，一切合乎手續嘅話，賣廣告就賣廣告啦，關其他人乜嘢事？過去一星期，有評論員、有專欄作家質疑廣告費（三十八萬幾）太便宜，是否得到一些報館以大折扣變相資助反梁，實在多鬼餘，呢啲人根本不識商業現實，憑空想像，你估報紙黑白全版廣告標價十萬，就會收足十萬乎？唔好笑大人個口，報紙廣告費因競爭激烈到極，折扣多多，未試過用真金白銀賣廣告嘅，請勿胡亂批評港大學生會。
其他九間大學學生會不知所謂，對黑金政治視若無睹，不發一言，竟然聯名批判港大學生會，佢地嘅獨立思考之能力，真係與港大生差咗一皮，唔怪得港大之排名，就係高一皮。黑社會、黑幫人物涉入政治，為個別候選人拉票，或做中間人拉票嘅話，會完全摧毀香港之核心價值──言論自由與新聞自由！寫稿罵人，批評別人，若涉及誹謗，最多被控告，上法庭，有官司可打，有法例保護，但若以後加多一層黑色政治威脅，因言論而日日恐怕被人跟蹤，扑頭，棒打，甚至刀劈嘅話，心理威脅極大，以後唯有閉口不言，下筆不敢批評。港大學生會廣告有一段：
「香港以自由、安全聞名於世，大眾在此安居樂業，這向來是港人引以為傲之處，也是香港繁榮穩定最重要的基石。只有個人自由、人身安全得到保障，社會中每一個人才能保持自由意志，免受暴力、強權侵凌，社會公義方能得以彰顯。香港的民主潮流浩浩蕩蕩，不可逆轉。但若蒙上黑惡勢力的陰影，即使將來實現普選，也注定是劣質普選，是被暴力挾持、徒有形式的骯髒作業，必將為禍香江。後患無窮！」
左丁山對此完全贊同，港大學生能有此思維、洞悉力，徐立之校長應引以為傲。港大學生會調查指出，近八成港大學生相信梁振英上台後會推行「特務政治」及「黑金政治」，深以為慮，故此學生會出錢賣廣告表達對黑金政治之強烈反感，順乎港大學生民意啫，使乜鬼理會 。

法國新移民

2012年03月09日

電器大王 M逝世後，子女接班， M公子與 M千金秉承傳統，農曆年後邀請傳媒食咖喱，今年選在九龍木球會，左丁山摸錯門，行到覺士道就走入去，原來係入咗九龍草地滾球會，木球會正門位於街尾。記得校友 C會長不時叫我地加入滾球會做會員，有得玩（滾球）有得食喎，以前肥佬黎就住在球會對面，如果左丁山又係咁，就一定入會，可惜唔係呢。
M公子請客，本應談吓電器市場之事，但最近競選情況激烈，加上有曾特首款待門事件，講講吓就以政治談話為主，想避都避唔甩，最近嘅飯局往往如此，正是你不理政治，政治來找你，無法逃避，好彩仲有人講吓旅行大溪地、巴黎，可以輕鬆好多。大溪地與巴黎都係講法文嘅，社長 P話與陶傑同遊巴黎最爽，因為陶傑法文一流，與當地人溝通絕無問題喎！
講起法文，好有用㗎。香港依家多咗好多法國人，識流利法文，可有不少機會。「國際先驅論壇報」（二月二十八日）有一篇長文講法國人時興移居香港， 2011年在香港居住嘅法國人有 10,456人，比 2006年增加六成，在中環街頭，到處可以聽到法文。在過往五年間，美國人、英國人、德國人移居香港唔係話冇，只是增長緩慢，唔似得法國人嚟得咁多啫。
點解會咁？與紅酒及藝術有關，記者訪問兩位三十歲左右嘅法國新移民，佢地話在法國苦無工作及創業機會，三年前把心一橫，移居香港創辦畫廊與高級紅酒入口，香港冇咗葡萄酒稅及講咗西九文藝區十年之後，法國人認為香港係進入中國市場之跳板，賣紅酒或賣西洋畫給中國富翁，大有前途。
香港不少人成日講國際化，有啲空口講白話，反而實實際際撤消葡萄酒稅之後，立即製造咗一個新行業，各國紅酒商人紛紛來港，西九建設，鬧交十年無成，但卻因此而喚起國際注意，香港係一個具有潛質嘅藝術市場。法國人喜歡移港，梗係好事啦，以陶傑嘅定義，凡係法國藝術文化都係好嘅，法國新移民呀，歡迎歡迎。

拜拜立法會

2011年07月23日

立法會告別遮打道，十月後搬入添馬艦新大樓，臨別之前，議員Ｗ邀請從未入過立法會嘅Ｑ大姐食告別午餐，Ｑ大姐又搵埋幾位朋友作陪，包括左丁山在內。呢座原高等法院大樓，古色古香，做立法會議事堂，淨係睇吓大樓外表，已有其莊嚴性，只可惜議事堂內，有時斯文掃地，議員衣着不雅猶其次，發言辯論時用詞粗卑，教壞學生，就最令議員失去應得嘅尊重，稱呼佢地係「尊貴的」，甚具諷刺性。
本來以為立法會午餐等於美心西式快餐，點知誤會晒，是日嘅午餐係聘珍樓中式點心，小菜加炒飯，算係中規中矩。大家閱報得知新立法會大樓餐廳冇公司落標，問議員Ｗ究竟情況如何，佢話：「各派議員有不同意見，未做過生意嘅議員以為立法會餐廳係皇帝女唔憂嫁，訂下嘅規範條件多多，張宇人呢位餐飲界議員就話睇見都怕，結果真係冇人落標，依家仲要繼續搵人傾。我地為之偷笑，以議員嘅『公平公正』標準，餐廳營運者要有社會責任，付最低工資（包埋飯鐘錢及假期計薪），聘請傷健人士等等，最後仲要餐價克己……呢個世界，蝕本生意點會做呀，入標前，餐飲業者計吓條數，知道蝕本機會好大嘅話，點肯落標吖。」
原來議會內有好唱高調之士，立法會曾有自助午餐之設，由一啲比較有名氣嘅中價餐飲集團提供，生意尚可，但後來有議員要求公平，加入社會企業餐飲公司提供自助午餐。一吃之下，啲議員走得八八九九，後來連倡議社企嘅議員都唔再堅持甚麼公平咯。議員Ｗ話：「公道啲講，我唔會話社企唔好，但因為佢地資源比較少，食材用料當然同餐飲集團冇得比，加上冇可能請到一級二級人才，競爭力係差好遠嘅，故此後來就不了了之。」
臨別秋波，議員Ｗ好彩抽中籤，先至得到一張枱請我地到立法會吃午餐，參觀立法會議事廳，睇電視嗰廳好似幾大，入到去，其實幾擠逼，議員向主席位擲蕉，要練習好耐先至會擲唔中，黃毓民屢擲不中，一定係有真功夫！

懷念馬可斯

2010年04月18日

星加坡係一個好地方，乾淨 衞生安全，住得舒服，政府清廉高效率，與香港比較，是否星加坡一百分，香港五十分呢？外表如此，但左丁山最唔高興本地記者/時事評論員經常捧到星加坡天上有地下無，我哋特區就一無是處。喂，傳媒界人士最注重言論自由、創作自由，你哋去到星加坡，夠唔夠膽以批評董特首、曾特首嘅文字、語調、言辭嚟批評李光耀、李顯龍呀？環保團體在星加坡敢唔敢反對填海呀？申請司法覆核呀？星加坡有冇明光社激烈反賭博呀？星加坡電台有冇大量烽煙節目時間畀不滿人士痛罵政府高官呀？
諗過度過，左丁山都係鍾意香港「蝸居」多過星加坡「安居」，除非星加坡准肥佬黎獨立獨資在星加坡開辦《蘋果日報》，否則左丁山一定唔會考慮到星加坡長住，小遊三四日就無妨。
酒店小 Y Y與肥仔Ｋ在外國讀書時，認識不少星加坡同學，呢班同學好多不願返回星加坡，留在外國嘅意願強烈過香港學生好多，點解會咁？自然有內在原因嘅。不過一啲香港記者憑表面觀察，盲目稱讚星加坡，唔去發掘深層故事啫。
在菲律賓有家族生意嘅福建Ｃ來電，講起泰國曼谷動亂，心為之危，好驚泰國會走上菲律賓道路，自毀長城，福建Ｃ嘆息話：「今日不少馬尼拉人憶念馬可斯，講出嚟好似荒謬，實際上係對目前現狀不滿。我在一九七六年在馬尼拉 Makati逛街，覺得唔知幾先進，與香港中環差唔多，當年去曼谷，是隆道、沙炎中心一帶似乜樣呀，與麥卡提相去極遠。但馬可斯倒台後，菲律賓三十年來有退無進，反而泰國進步神速，已趕過菲律賓。馬可斯係獨裁，係貪污，但做到啲事，經濟有建設，今日嘅菲律賓，冇貪污咩？但做唔到事噃！」現實政治問題，令人非常煩惱，有理說不清，究竟亞洲人需要民主吖，還是喜歡安定繁榮，不理政府是否貪污、獨裁或清廉而霸道嘅家長式管治？到何時何日，亞洲人先至可以得到澳洲 /紐西蘭式嘅民主自由與安定繁榮並存？